Starbucks 新商標

新logo 雖劣評如潮 星巴克深謀遠慮

好多中環人都用一杯「星記」咖啡開始新的一天，不過噚日朝早大家都感覺怪怪地，因為全球星巴克噚日起換新商標，美人魚圖案保留，但「Starbucks Coffee」字眼消失，底色亦由黑轉綠。

二十年商標一夜變身，啡友反應麻麻，facebook劣評如潮，有人認為新商標唔夠典雅，又話無咗Starbucks字樣，感覺似冒牌貨，更有人發起聯署，要求星巴克「還我舊LOGO」，否則以後轉去幫襯「P記」喎。

凌通請教過理工大學亞洲品牌管理中心陸定光教授，佢話啡友的反應可以理解，因為支持者會對品牌投放感情，一旦商標轉換，粉絲感情受損，加上懷舊心態，自然認為「新不如舊」。

陸定光話，星巴克成功非僥幸，每一步都有盤算，甚至成為商學院案例，今次變身亦大有玄機。據佢分析，星記此舉瞄準兩大市場，第一個是咖啡之外的飲品和食物，例如雪糕、啤酒甚至紅酒。

佢解釋，星記從來唔係賣啡，而係賣一種lifestyle、一個公共場所，既然係咁，自然食得唔好嘥，喺有限店面盡量多賣多賺，抹去商標上的「Coffee」，就係為此鋪路。

第二個市場，就係我地偉大的祖國，因為原有商標上的字是英文，大大個英文招牌掛在長城、故宮、西湖等旅遊勝地，難免格格不入。另外，中國的山寨創意驚人，很多店家自製「上海星巴克」、「山西星巴克」等商標魚目混珠，正牌星記都奈佢唔何，今次索性只用美人魚圖案，畀人抄都易告得入。

換新裝之外，星記噚日亦慶祝40周年，並宣布下月起在中國銷售即沖咖啡粉，實行上下通殺。大摩睇好星記新路線，上調評級至增持，目標價達40美元新高，溢價20%。

如果股價報捷，中環的星之子、星之女會否覺得條魚愈來愈順眼？不如隊多杯Latte，再考慮入兩手星記股票啦。

轉載：信報 2011年3月9日